26 നവംബർ 2008

ബ്ലോഗിലെ ബുജികളോട് ഒരഭ്യര്‍ത്ഥന (ബുദ്ധി ജീവികള്‍! അതെന്ത് ജീവിയാണോ ആവോ?)

ഇനിയെങ്കിലും നിര്‍ത്തിക്കൂടെ സുഹൃത്തുക്കളേ?

നിങ്ങളുടെയൊക്കെ ഏത് പോസ്റ്റിലും ഈ തെറിവിളികളാണല്ലോ നടക്കുന്നത്? ഗൌരവമായ ചര്‍ച്ചകള്‍ നടക്കുന്നു എന്ന തോന്നലിലാണ് നിങ്ങളുടെയൊക്കെ പോസ്റ്റുകള്‍ അഗ്രിയില്‍ കാണുമ്പോള്‍ ഇല്ലാത്ത സമയത്ത് ചാടിക്കേറി വന്ന് വായിക്കുന്നത്. കണ്ണിന്റെ ഫ്യൂസ് പോവുക, മനസ്സില്‍ വൃത്തികെട്ട വികാരങ്ങള്‍ വരിക എന്നല്ലാതെ നിങ്ങളുടെ “മഹത്തായ“ ബ്ലോഗുകള്‍ കൊണ്ടോ പോസ്റ്റുകള്‍ കൊണ്ടോ ഒരു ഉപകാരവും ഉണ്ടാകുന്നില്ല എന്ന് നിങ്ങള്‍ മനസ്സിലാക്കുന്നുണ്ടോ?ആരോഗ്യകരമായ ചര്‍ച്ചകള്‍ക്ക് പകരം തെറിവിളിയും തന്തക്കു വിളിയും വര്‍ഗ്ഗീയതയും ജാതീയതയും രാഷ്ട്രീയവും ആയി മനസ്സിലെ വൃത്തികെട്ട മാലിന്ന്യങ്ങള്‍ പുത്തേക്ക് വ്യമിപ്പിക്കുക എന്നല്ലാതെ വേറെ വല്ല ഉദ്ദേശവും നിങ്ങള്‍ “വലിയ” വിവരമുള്ളവര്‍ക്കുണ്ടോ?

പല ബുജി ബ്ലോഗുകളിലും കാണുന്നത് ഏതെങ്കിലും ഒരുരാഷ്ട്രീയത്തിന്റെയോ, മതത്തിന്റേയോ, ജാതിയുടേയോ, ഗ്രൂപ്പിന്റെയോ ഒക്കെ വാലുകള്‍ ഫിറ്റ് ചെയ്ത് വാലാട്ടുകയും മറ്റവനെ നോക്കി കുരക്കുകയും ചെയ്യുന്നവരേയാണ്. തന്തക്ക് വിളിയും തള്ളക്ക് വിളിയും! ഇതാണോ നമ്മള്‍ കൊട്ടിഘോഷിക്കുന്ന കേരളത്തിനെ തനത് സംസ്കാരം? സാക്ഷരത? ദൈവത്തിന്റെ നാടാണത്രേ. പിശാചുക്കള്‍ താമസ്സിക്കുന്ന നാടാണത്. നമ്മള്‍ പുച്ഛത്തോടെ കാണുന്ന തമിഴനും, തെലുങ്കനുമൊക്കെ നമ്മളേക്കാള്‍ പതിന്മടങ്ങ് ഭേദം.

കഷ്ടം എന്നല്ലാതെന്ത് പറയാന്‍? സുഹൃത്തേ, ഇത് നിസ്സാരമായി കാണേണ്ടതല്ല. കാരണം തൂലികാനാമത്തില്‍ ബ്ലോഗുന്നതിന്റെ സ്വാത്ന്ത്ര്യത്തില്‍ പ്രകടമാവുന്നത് യഥാര്‍ത്ഥ മലയാളി മനസ്സാണ്. പ്രതികരിക്കുക എന്ന നാട്യത്തില്‍ കാണിക്കുന്നത് ആരും ആളെ തിരിച്ചറിയില്ല എന്ന ധൈര്യത്തില്‍ മനസ്സിലെ മാലിന്യം മുഴുവന്‍ തുറന്ന് കാണിക്കുകയും.ഇവനൊക്കെ പുറത്ത് കടന്നാല്‍ ശുദ്ധ മാന്യനായിട്ടായിരിക്കും അറിയപ്പെടുക. മാത്രമല്ല നല്ല നിഘണ്ഡു ഭാഷയില്‍ സംസാരിക്കും. ചേരിയിലുള്ളവരുടെ ഭാഷ കേട്ടാല്‍ ‘ഛേ’ യെന്ന് പുരികം ചുളിക്കും. ഉള്ളിലെ ജാതിക്കോമരത്തെ അടക്കി നിര്‍ത്തി തികഞ്ഞ മതേതരനും ജാതിയില്ലാത്തവനും ആവും. രാഷ്ട്രീയമില്ലാത്ത നിക്ഷ്പക്ഷന്‍! ത്ഫൂ....

നിങ്ങളേ പോലുള്ള വിവരമുള്ളവര്‍ പൊതുസമൂഹത്തിന്റെ പ്രശ്നങ്ങളിലിടപെട്ട് ആരോഗ്യകരമായ ചര്‍ച്ചകള്‍ നടത്തി എന്നേപ്പോലുള്ള സാധാരണ വായനക്കാരെ ആ പ്രശ്നങ്ങളിലെ യഥാര്‍ത്ഥ്യം മനസ്സിലാക്കി തരുക എന്ന ദൌത്യമാണ് ഏറ്റെടുക്കേണ്ടത്.

അല്ലാതെ നിങ്ങളുടെ വിലപ്പെട്ട സമയം ഇത്തരം ചക്കളത്തിപ്പോരാട്ടങ്ങള്‍ക്ക് വേണ്ടി ചിലവഴിച്ച് അത് ഒരു പൊതു ചര്‍ച്ച എന്ന രീതിയില്‍ സമൂഹത്തിലേക്കിറക്കി, ഇവിടെന്തോ മഹാസംഭവം നടക്കുന്നു എന്ന് കരുതി വായിക്കാനെത്തുന്ന എന്നേപോലത്തെ പാവം വായനക്കാരുടെ മനസ്സിലേക്ക് വൃത്തികെട്ട രാഷ്ട്രീയത്തിന്റേയും ജാതി/മത വര്‍ഗ്ഗീയതയുടേയും മാലിന്യങ്ങള്‍ നിറക്കുകയല്ല നിങ്ങള്‍ വേണ്ടത്.

സഹികെട്ട് പറയുന്നതാണ്. ഒന്നുകില്‍ നിങ്ങള്‍ ഇത്തരം തറ ഇടപാടുകള്‍ നിര്‍ത്തുക. അല്ലെങ്കില്‍ പൊതു സമൂഹത്തിലേക്ക് ഇവയെ ഇറക്കിവിടാതെ നിങ്ങളുടെ ഗ്രൂപ്പുകളിലേക്ക് ഒതുക്കി നിറുത്തുക.

എന്ത് അഭിപ്രായമായാലും തുറന്ന് എല്ലയിടത്തും ഒരുപോലെ പ്രതിപക്ഷ ബഹുമാനത്തോടെ ചര്‍ച്ച ചെയ്യുമ്പോഴേ അത് ആരോഗ്യകരമായ ചര്‍ച്ചയാവൂ. അതാണ് ആരോഗ്യകരമായ ഒരു സമൂഹത്തിന്, വിശിഷ്യാ, നമ്മുടെ സാക്ഷരകേരളത്തിന് ഭൂഷണം.അല്ലാതെ തനിക്കിഷ്ടമില്ലാത്തത് പറയുന്നവനെ കൂവിയും, തെറിവിളിച്ചും, തന്തക്ക് വിളിച്ചും നിശബ്ദനാക്കുന്നത് നല്ല സമൂഹത്തിന് യോജിച്ച പ്രവൃത്തിയല്ല.
പ്രതികരിക്കുക എന്നത്, എവിടെയാണ് ന്യായം എന്ന് കൃത്യമായി മനസ്സിലാക്കി ആ ന്യായത്തിനുവേണ്ടി ശബ്ദമുയര്‍ത്തുക എന്നതാണ്. അല്ലാതെ തന്റെ ചുറ്റും നില്‍ക്കുന്ന, അല്ലെങ്കില്‍, തന്റെ യജമാനനമാര്‍ ചെയ്യുന്ന തോന്ന്യാസങ്ങളെ ന്യായീകരിക്കാന്‍ വേണ്ടി നടത്തുന്ന ഓരിയിടലല്ല.

നിങ്ങളുടെ ആരുടേയും ജാതിയോ മതമോ എനിക്കറിയില്ല. നിങ്ങളുടെ ആരുടെയും രാഷ്ട്രീയ പാര്‍ട്ടി വിധേയത്തവും എനിക്കറിയില്ല. പക്ഷേ കുറച്ചുകാലമായി ബ്ലോഗിലെ ഒരു വായനക്കാരന്‍ എന്ന നിലയില്‍ ഇവിടെ കാണുന്ന ചില വൃത്തികേടുകള്‍ ഇനിയും പറയാതിരിക്കാന്‍ വയ്യ എന്നതു കൊണ്ട് മാത്രമാണ് പ്രതികരിക്കുന്നത്.

നിങ്ങളേപ്പോലെ വലിയ ആളുകളെ വിമര്‍ശിക്കാന്‍ തക്ക വിവരമൊന്നുമില്ലാത്ത ഒരു സാദാ വായനക്കാരനാണ് ഞാന്‍. ഞാന്‍ പറയുന്നത് നിങ്ങള്‍ക്ക് ഗൌരവമായി തോന്നുകില്ലായിരിക്കാംഎന്നാലും ഒരു ചെറിയ അഭ്യര്‍ത്ഥന മാത്രം. ഞാന്‍ പറയുന്നതിന്റെ പോസ്സിറ്റീവ് ആയ വശത്തില്‍ കാണുക.

ഞാന്‍ ഓരു ജാതിയുടേയോ, മതത്തിന്റേയോ, രാഷ്ട്രീയത്തിന്റേയോ അനുയായി അല്ല. എന്നാല്‍ വ്യക്തമായ രാഷ്ട്രീയ കാഴ്ചപ്പാടുകള്‍ ഉള്ള ഒരു സാധാരണ മലയാളി. നിക്ഷ്പക്ഷ മുഖം മൂടിയില്ലാത്ത തെറ്റ് ആരുടെ ഭാഗത്തായാലും അത് ചൂണ്ടിക്കാട്ടി ശരിയുടെ പക്ഷം പിടിക്കാന്‍ ശ്രമിക്കുന്ന “പക്ഷപാതി”

11 നവംബർ 2008

രാജ്യസ്നേഹം / രാജ്യദ്രോഹം / തീവ്രവാദം

ഇപ്പോള്‍ ഏറ്റവും കൂടുതല്‍ കേള്‍ക്കുന്നതും ചര്‍ച്ച ചെയ്യപ്പെടുന്നതുമായ വാക്കുകള്‍

ആരാണ് തീവ്രവാദി? ആരാണ് രാജ്യദ്രോഹി? ആരാണ് രാജ്യസ്നെഹി? കൃത്യമായ ഒരു നിര്‍വചനം ആര്‍ക്കെങ്കിലും തരാന്‍ കഴിയുമോ? രാജ്യത്തെ പീഡിപ്പിക്കപ്പെടുന്ന ജനങ്ങള്‍ക്കുവേണ്ടി ഭരണകൂടത്തിനെതിരെ ആയുധമെടുത്ത് പൊരുതുന്നവരെ അങ്ങനെ വിളിക്കുന്നുണ്ട്. അവര്‍ രാജ്യദ്രോഹികളാണോ? ഭരണകൂടഭീകരതക്കെതിരെ പോരാടുന്നവരെല്ലാം രാജ്യദ്രോഹികളാണോ? അന്യ രാജ്യത്തിനു വെണ്ടി വിധ്വംസക പ്രവര്‍ത്തനങ്ങള്‍ നടത്തുന്നവര്‍ രാജ്യദ്രോഹികള്‍ തന്നെ.

അങ്ങനെയെങ്കില്‍ താഴെപ്പറയുന്നവരെ ഏത് ലിസ്റ്റില്‍ പെടുത്തുമെന്ന് ദയവായി പറഞ്ഞുതരിക.

1) ജനങ്ങളൂടെ നികുതിപ്പണം ധൂര്‍ത്തടിക്കുന്ന ഉദ്യോഗസ്ഥര്‍ / രാഷ്ട്രീയക്കാ‍ര്‍
2) അഴിമതിക്കാരായ ഭരണകര്‍ത്താക്കള്‍.
3) നികുതി വെട്ടിക്കുന്ന വമ്പന്‍ മുതലാളിമാര്‍
4) അവരെ സഹായിക്കുന്ന അധികാരികള്‍
5) രാജ്യ താത്പര്യം അടിയറവെക്കുന്നവര്‍
6) കള്ളക്കടത്തുകാര്‍
7) ഹവാല ഇടപാടുകാര്‍
8) കള്ളനോട്ടടിക്കാര്‍
9) വനം കൊള്ളക്കാര്‍
10) കള്ള പാസ്പോര്‍ട്ടും സര്‍ട്ടിഫിക്കറ്റും ഉണ്ടാക്കുന്നവര്‍

അങ്ങനെ നിരത്തിയാല്‍ തീരാത്ത ലിസ്റ്റിലുള്ള ഇവരൊക്കെ രാജ്യസ്നേഹികളോ അതോ രാജ്യദ്രോഹികളോ? എന്തിന്, വൈദ്യുതി മോഷ്ടിക്കുന്ന സാധാരണക്കാരനും, വമ്പന്മാരും, കുക്കിംഗ് ഗാസ് വെച്ച് വണ്ടിയോടിക്കുന്നവനും ഒക്കെ രാജ്യ സ്നേഹികളാണോ?

തീവ്രവാദത്തിനും, രാജ്യദ്രോഹത്തിനും, രാജ്യസ്നേഹത്തിനും കൃത്യമായ നിര്‍വചനം ആര്‍ക്കെങ്കിലും അറിയുമെങ്കില്‍ ദയവായി പറഞ്ഞുതരാമോ?

10 നവംബർ 2008

ഈശ്വരാ... മുകുന്ദന്റെ വിലാപങ്ങള്‍?

സ. വി.എസ് കാലഹരണപ്പെട്ടു എന്ന് ശ്രീ മുകുന്ദന് ഇപ്പോള്‍ തോന്നാനുള്ള കാരണം? ഫ്രെഞ്ച് സര്‍ക്കാരുദ്യോഗവും അവരുടെ ബഹുമതികളും ഒപ്പം പുരോഗമനവാദിയെന്ന നാട്യത്തില്‍ കൌശല പൂര്‍വ്വമായ എഴുത്തിലൂടെ വായനക്കാരെ തെറ്റിധരിപ്പിച്ചയാളാണ് ശ്രീ മുകുന്ദന്‍. ന്മ്മുടെ നാടിനെ കോളനിയാക്കിയവരാണ് ഫ്രഞ്ചുകാര്‍, ബ്രിട്ടീഷു കാരുടെ അത്രക്കല്ലെങ്കിലും.
ഫ്രെഞ്ച് ഏംബസ്സിയിലിരുന്ന് “ഡല്‍ഹി” എഴുതി യുവാക്കളെ വഴിതെറ്റിച്ച, “കേശവന്റെ വിലാപങ്ങള്‍” എഴുതി സ. ഇ.എം.എസ്സിനെയും പ്രസ്ഥാനത്തെയും മോശമായി (തന്ത്രപൂര്‍വ്വം പാര്‍ട്ടിക്കാര്‍ പോലും അറിയാതെ) ചിത്രീകരി‍ച്ച് ഇ.എമിന്റെ പടം കൊടുത്ത് മാര്‍ക്കറ്റ് ചെയ്ത, ഇപ്പോള്‍ “പ്രവാസ്സ“ത്തില്‍ മുട്ടിന് മുട്ടിന്ന് ഈശ്വരനെ വിളിച്ച് (കറുത്ത ഫലിതമാണത്രെ! വയസ്സായപ്പോള്‍ ഇത്തിരി തമാശയും ഈശ്വരനെ വിളിക്കലുമാവാമെന്ന് കൈരളിയില്‍ കണ്ട അഭിമുഖത്തില്‍) നല്ല പോലെ മാര്‍ക്കറ്റ് ചെയ്തതിന്റെ (അതിലുമുണ്ട് കമ്മ്യൂണിസ്റ്റുകാര്‍ക്കുള്ള കൊട്ടല്) സന്തോഷത്തിലായിരിക്കും ശ്രീ മുകുന്ദന്‍. റിട്ടയര്‍ ചെയ്തപ്പോള്‍ കയറിക്കിടക്കാനൊരിടം കൊടുത്തതും പാര്‍ട്ടിക്കാര്‍! അതിന്റെ ഉപകാരസ്മരണയിലായിരിക്കും പാര്‍ട്ടിയിലുണ്ടെങ്കിലും പടിക്കു പുറത്തു നില്‍ക്കുന്ന സ. വി.എസ്സിനെ കാലഹരണപ്പെട്ട പുണ്യവാളനെന്ന് വിളിക്കാന്‍ പ്രേരിപ്പിച്ചത്.
ഈ എണ്‍പതാം വയസ്സിലും ചെറുപ്പം നിറഞ്ഞ മനസ്സുമായി അടിസ്ഥാന ജനത്ക്കു വേണ്ടി പോരാടുന്നയാളാണ് വി.എസ്. മുഖ്യമന്ത്രി എന്ന നിലയില്‍ അദ്ദേഹത്തെ പ്രവര്‍ത്തിക്കാന്‍ സ്വാതന്ത്യം കൊടുത്തിരുന്നെങ്കില്‍ കേരളത്തിലെ പല മാഫിയകളും ഇന്ന് ജയിലിനകത്തായേനെ. എന്തിനും ഏതിനും കുറുക്കുവഴികള്‍ തേടുന്ന മലയാളിക്ക് അദ്ദേഹം പരിഹാസ്യനായിരിക്കാം എന്നാല്‍ നേരും നെറിയും ഉള്ളവര്‍ അദ്ദേഹത്തെ ഇഷ്ടപ്പെടുക തന്നെ ചെയ്യും. അതുകൊണ്ട് തന്നെയാണ് എന്നും അധികാരത്തിന്റെ തണല്‍ ചേര്‍ന്നു നടക്കുന്ന മുകുന്ദന് അചുതാനന്ദന്‍ കാലഹരണപ്പെട്ടു എന്ന് തോന്നുന്നത്. സ.പിണറായിക്ക് സ്തുതിപാടി നടക്കുന്നത് അക്കാദമികളും അവാര്‍ഡുകളും സ്വപ്നം കണ്ടുതന്നെയാണ്. ഇവരൊക്കെ പ്ഞ്ചനക്ഷത്രക്കുളിരിലിരുന്ന് വിപ്ലവം പറയുന്നവരാണ്. വി എസ്സിനേപ്പോലെയാവാന്‍ ഇവൊര്‍ക്കൊന്നും ഏഴായുസ്സ് കിട്ടിയാലും പറ്റില്ല.

ഏതായാലും മുകുന്ദന്റെ പുസ്തകങ്ങളെ നന്നായി മാര്‍ക്കറ്റ് ചെയ്യുന്ന ഡി.സി. രവിമുതലാളിയോടുള്ള കൂറും ഇതിലുണ്ടെന്ന് തോന്നുന്നു. അതുകൊണ്ടാവും‍ അത്ര പ്രശസ്തമല്ലാത്ത ഡി.സിയുടെ “പച്ചക്കുതിര” ക്ക് മാര്‍ക്കറ്റ് ഉണ്ടാക്കാന്‍ ജനപ്രിയനായ വി.എസിനെ തന്നെ പിടിച്ച് വിവാദമുണ്ടാക്കിയത്. ഒപ്പം പിണറായിയെ സന്തോഷിപ്പിക്കുക എന്ന ഒരുവെടിക്ക് രണ്ടുപക്ഷി എന്ന സ്ഥിരം തന്ത്രവും.

22 ഒക്‌ടോബർ 2008

രാജ്യദ്രോഹം.

ചാന്ദ്രയാന്‍ ദൌത്യം വിജയത്തിലേക്ക്! ഇന്ത്യന്‍ ശാസ്ത്ര ലോകത്തിനഭിമാനിക്കാവുന്ന നേട്ടം 110 കോടി ഇന്ത്യന്‍ പൌരന്മാരും അഭിമാനം കൊള്ളുന്നുവെന്നും ആഹ്ലാദിക്കുന്നുവെന്നും രാവിലെ റേഡിയോ വാര്‍ത്ത.

ഇല്ല സുഹൃത്തേ എന്നിക്കാ വാര്‍ത്തയില്‍ അഭിമാനം തോന്നിയില്ല. ഞാന്‍ ആഹ്ലാദിച്ചില്ല.

ഒരു നേരത്തെ വിശപ്പടക്കാനും അന്തിയുറങ്ങാന്‍ ഒരു കൂരയും ഇല്ലാത്ത ജനകോടികള്‍ ഇന്ത്യന്‍ പൌരന്മാരല്ലേ? അവര്‍ ആഹ്ലാദിച്ചിരിക്കുമോ?

തെരുവിലുറങ്ങുന്ന, അന്നത്തിനായന്യന്റെ എച്ചില്‍ തിരയുന്ന ബാല്യങ്ങള്‍ ഇതറിഞ്ഞ് ആഹ്ലാദിച്ചിരിക്കുമോ?

മുന്നൂറ് കോടിയിലധികം രൂപ ചിലവിട്ട് ചന്ദ്രനില്‍ വെള്ളം തിരയുന്ന വിവരം കുടിക്കാനൊരു തുള്ളി വെള്ളത്തിനായി കിലോമീറ്ററുകള്‍ നടക്കുന്ന ഇന്ത്യന്‍ ഗ്രാമീണര്‍ അറിഞ്ഞിരിക്കുമോ? ആ വെള്ളം തങ്ങളുടെ ദാഹമകറ്റുമെന്നവര്‍ ആഹ്ലാദിച്ചിരിക്കുമോ?

ഉണങ്ങിക്കരിഞ്ഞ കൃഷിയിടങ്ങളെ നോക്കി ആത്മഹത്യയെക്കുറിച്ച് ചിന്തിക്കുന്ന ഇന്ത്യന്‍ കര്‍ഷകന്‍ ആഹ്ലാദിച്ചിരിക്കുമോ?

ഉണ്ടെങ്കില്‍, ഞാനും ആഹ്ലാദിക്കുന്നു അവരോടൊപ്പം.

ഓ.ടോ.

ചാന്ദ്രയാന്‍ ദൌത്യത്തിന് ചുക്കാന്‍ പിടിച്ചത് മലയാളികളാണെന്ന് റേഡിയോക്കാരന്‍. ഇന്ത്യാക്കാരല്ല.

21 ഒക്‌ടോബർ 2008

പക്ഷപാതി.

ഞാന്‍ ബ്ലോഗില്‍ തുടക്കം കുറിക്കുന്നു. ബ്ലോഗ് വായന തുടങ്ങിയിട്ടൊത്തിരി നാളായി. അപ്പോള്‍ മുതല്‍ മനസ്സില്‍ ചിന്തിക്കുന്നതാണ് സ്വന്തമായി ഒരു ബ്ലോഗിനെ പറ്റി. ഇന്നത് തുടങ്ങുന്നു. തല്‍ക്കാലം അജ്ഞാതനായി തുടങ്ങുന്നു. അതിനര്‍ത്ഥം ഇന്ന് ബ്ലോഗില്‍ കാണുന്ന ചില അജ്ഞാതരേപ്പോലെ ആരേയും മന:പൂര്‍വ്വം അവഹേളിക്കാനൊ വൃത്തികെട്ട ഭാഷ ഉപയോഗിക്കാനോ അല്ല. എന്റെ വീക്ഷണ കോണിലൂടെ ചില കാര്യങ്ങള്‍ പറയാനും, സ്വയം വിമര്‍ശന പരമായി നമ്മുടെ സമൂഹത്തെ നോക്കുമ്പോള്‍ എനിക്കു തോന്നുന്നത് അവതരിപ്പിക്കാനുമായി മാത്രം.